Shayad yahi Life hai!!!

Subah ki chahchati aawazein sabhi ko achchi lagti hai, Har koi chahta hai ke zindagi aisi hi ho toh kitna achcha ho. Sab Khush, sab shant. 

Din aage badhta hai Shor badhta hai Log busy hote jaate hai, sadko pe daudti gaadiyaa zindagi ki raftaar ke tarah hai, Sadak khaali to Gaadi tez aur achche se chalti hai, Bheed badhi to gaadi thoda atak atak kar aage badhti hai waise hi zindagi ki raftaar bhi kabhi kam kabhi zyada. 

Jab main Kinaaro ko dekhta hu to lagta hai ye wo mukaam hai jo hamare saamne se peeche chhootte jaate hai par wo manzar bhi roz badal jaate hai. Naye log nayi jagah Zindagi kabhi nahi rukti. Bas badhte raho nahi toh peeche ke log aage nikal jaate hai aur aapko aage chalne ke liye bahut mehnat karni padti hai. 

Roz naye safar pe niklta hu naye mukaam, Nayi pehchaan nayi soch naye taur tariko se aage badhte log mujhe bhi badlne ko prerit karte hai. Aage badhta hu toh dekhta hu k main akela chala tak kuch saathi mile kuch ne saath nibhane ke vaade kiye kuch ne raasta badal liya. Vaada karne wale logo mein se bhi kuch log vaado ko chhod kar aage niklne ki daud mein mujhe hi giraane ki koshish karte bhi dikhe. jo vaade nibhate rahe wo hamasafar ban gaye par jisko jaha manzil mili wo wahi reh gaya fir naye log aur fir se wahi kahani.

Shayad Yahi Life hai!!!!